Fólk leiðir almennt ekki hugann að því hvaða áhrif slæm innivist hefur umfram óþægindin sem þjakar þá sem verða að þola hana. Í daglegu tali eru óþægindi af þessu tagi nefnd "húsasótt". Slæm innivist hefur veruleg áhrif á vinnuafköst og þar með fjárhagslega afkomu fyrirtækja. Rannsóknir hafa t.d. leitt í ljós að vinnuafköst geta minnkað um allt að 20% ef innihiti er hækkaður um 2 – 3°C umfram kjörhitastig viðkomandi vinnustaðar.

Góð birta í húsum, réttur hiti og rakastig, gott andrúmsloft og náttúruleg efni, sem ekki menga frá sér, þarf að hafa sérstaklega í huga við hönnun og byggingu húsa.

Ef miðað er við að venjulegt skrifstofustarf kosti um 3 milljónir króna á ári þá er ljóst að óeðlilega hátt hitastig og þar með verri nýting starfskrafta vegur umtalsvert í fjárhagslegri afkomu fyrirtækis sem byggir starfsemi sína á umsvifamiklum skrifstofurekstri. Þar við bætist síðan hærri kostnaður vegna upphitunar. Þannig er einnig farið um marga aðra áhrifsþætti sem verka á fólk í starfi innanhúss, en vitaskuld með misjöfnum þunga.